"Ta det korn og la det vandre....."

Det byrjer å nærme seg NM og det er mykje som skal gjerast. Eg føler at hovudproblemet mitt no ligg i avtrekk og kontroll i 10 sek serie. Gradvis jobbing med grepet må til og har nok hatt effekt , sjølv om eg er i startgropa enno. Trening på press, dvs jobbe vidare med automatisering av balanse, pust, løft og avtrekk går sin gang.

Korleis eg så skal trene og få kontroll av 5 avtrekk på 10 sek er noko verre. Førebels har eg endra litt på heimetreninga. Eg har bytta ut haldøvinga med duell, der eg i kvar 7 sek pause under pust ladar våpen. I løftet køyrer seg så 1 avtrekk og 4 simulerte på så kort tid som råd. Ikkje ideelt, men eg lærer jo litt av kor langt eg skal trekk av. Det som viser seg er jo at kornet går over alt, frå side til side og opp og ned. Akkurat som skota mine i serien. Tru om det er ein samanheng.........

Ukonsentrert hovud som ikkje er skrudd rett på ?

I går var det ny trening, og det var vel ei trening som på alle områder gav blanda kjensler.

Kort summert var eg ukonsentrert, hadde dårleg avtrekkskontroll og måtte jobbe tungt med å halde fokus.

Plana var å jobbe med nokre serier med press, før eg gjekk vidare til duell og 10 sek seriar på presskive. Hovudfokus skulle vere å halde hovudet rett,dvs sjå rett fram med sikte auget slik at øyre er paralelle med skive og augene i horisontalplan. Det er jo svært logisk slik at bogegangane i det indre øyre ikkje må jobbe i ugunstig posisjon. Merkeleg nok er det for meg svært vanskeleg å få til dette. Må vere feil skrudd på, dette hovudet mitt, men det er noko som mange har påstått allereie.

Som nemnt var florerte avtrekksfeil og eg måtte konstant jobbe med å halde på konstentrasjonen.

Noko positivt tek eg likevel med meg. Tross alt det negative var stort sett haldområdet frå 8 og inn, så grunntreninga sit relativt bra. Tross dårleg konsentrasjon fungerer mykje av automatikken, så prosessen med å få mest mogleg over i det umedvitne er på god veg.

Framover må fokus endrast meir og meir på mental trening. Eg må visualisere i stadig større grad for å automatisere. Konsentrasjonsevna må trenast opp utanfor bana. På bana må eg jobbe vidare med duell og 10 sek serie på presskive . På heimebane må eg jobbe vidare med avtrekk og posisjon.

Å endre fleire faktorer samtidig er vanskeleg.

I dag var eg atter heime att på 12,5 m bane med Colt skive. Etter å ha skutt sentrert på 25 meter var det litt styr å komme attende til sub-six. 18+15+5+1 klikk, så var eg der.

Nye briller frå Nille var også på plass. Eg brukar + 0,75 og + 0,5 frå før, så no prøvde eg + 1,0 på begge auger. Vi får sjå kor det går, det var i alle fall lettare å få blinken uklar ....

Skjefte har fått litt tremasse inn mot handbaken. I tillegg er hylla flytta litt opp. Det verkar litt meir stabilt, pistolen ligg liksom meir fast i grepet.

Etter nokre skot på press, gjekk eg over å veksle frå  10 sek serier til duellserier. Betre samlingar med haldområdet på 9, og eg dreg ikkje så langt til venstre. Dette kan tyde på skjefteendringane har noko for seg, eg må sjå korleis det går framover.

Ellers jobba eg saman med ein kollega med å sjekke at hovudet er retta rett mot blinken, eg har litt å jobbe her.

Mentalt arbeid er også eit området så eg må starte på .... it's all in my head....

Intensiv (for meg) og hyggeleg kveld med Lars

I går kveld fekk eg sjanse til å trene litt på Løvenskioldbana saman med Lars Kanedal. Han ofra 3 timar ein fredag kveld for å gje meg nokre tips og hint om korleis ein kan komme seg vidare og legge opp treninga meir fornuftig. Eg må innrømme at det er litt spesielt å ha nokon som ser på deg heile tida når ein skyt. Eg er ikkje van å trene med ein som observerer, men det gjekk faktisk svært greit. Eg og ein skytterkollega bør trene litt på å sjå på kvarandre.

No kan det vere at bloggen vert litt rotete idag, men det er vel for at eg må få på plass dei viktigaste elementa som eg må hugse.

Lars observerte at eg truleg var litt i ubalanse med hovudet, så eg må heim å sjå på meg sjølv i speil for å sjå om eg kan gjere små endringar. Eit tips er å stå bak og studere om hørselsvern er parallelt med skivene.

Eg pressa sikteauget litt saman, sjølv om eg nytta briller. Dette tyder truleg at eg må sjå på briller som er 0,5-0,75 sterkare enn dei eg har.

Ellers gjekk skyting på presisjonsskive svært bra når eg skaut utan tidspress.

Når tempo gjekk ned til 10 sekund fekk vi pressa fram fleire områder for forbetring. Når eg slepp ut att avtrekker har eg ikkje vore nøye på at kornet rører på seg litt. Det er visstnok ikkje lov. Så her har vi potensiale. Vidare kan det vere eit teikn på at skjeftet ikkje er godt nok tilpassa. Saman med det faktum at eg dreg skota litt mot venstre når det går fort, peikar det på at skjeftet må jobbast litt med. Ved litt studie på plassen kom eg fram til at det litt romt på området mot bakre del av handflata. Så no må eg bygge litt her. Samt trene vidare med fokus på avtrekk.

Løftet var det som vi ellers jobba med. Eg har eit greit løft, men bør fokusere på å senke hastigheiten på løftet inn mot skiva i siste del av løftet. Ved å halde fokus på haldområdet, men konsentrere meg om kornet i siste del av løftet senkar ein automatisk hastigheita, samt unngår å løft over skiva.

For å trene litt på dette prøvde eg ein del duellskyting. Det har eg aldri prøvd før. Aldri sikta svart i svart og sentrert, og aldri på duellskive. Det byrja bra, med ein del ti , men eg har ein tendens til å dra skota og samlinga ut mot venstre. Så igjen det med skjeftet. Lars gav eit godt tips om korleis trene opp løft og faktisk skulder i samme seanse - køyr mange duellserier. Det skal eg visstnok bli mør av, og i dag kjenner eg faktisk at skuldra har trent litt utanom det vanlege. Så statiske haldøvingar vert gjort heime, samt dynamisk styrke og duell på trening.

For å avslutte foreslo Lars at eg skulle skyte ein serie med NAIS - 2 x 150 sek, 2x duell, 1x 20 sek og 1 x 10 sek.  Etter at kruttrøyken hadde lagt seg - 278 poeng . Så her har vi skote til gullmerke. Fantastisk.

Så alt i alt ein svært vellukka kveld. Eg fekk svært god feedback, fekk tilbakemelding på kva som fungerer og kva eg kan vurdere. Eg fekk påpeika ein del områder der eg må endre trening og kvar eg er svakast slik at eg kan jobbe vidare på desse områda. Det er jo slik at det er på dei områda ein til ein kvar tid er svakast ein må jobbe.

For dei som er i området og som ønskar ein god trener - spør om du ikkje kan få leie/låne/kjøpe Lars nokre timar. Det er det vel verdt.

Ei legende....

Harald Stenvaag er for meg ei legende. Han har vore med i utviklinga av skytesporten og gjort det svært bra over svært lang tid. Medaljar av ulike valørar i ulike mesterskap som det står stor respekt av.

Han driv ein nettbutikk der han sel våpen mm, dei fleste innan sporten kjenner han godt. Eg var innom han igår ein tur for å handle Eley sport, skivetolkar mm. I tillegg fekk eg ein svært hyggeleg samtale angåande skyting, trening, ein masse råd mm. Tida går fort når ein får tappe kunnskap frå ei slik kjelde.

Vi får bruke han og Børselars så vi kan beholde desse kjeldene lenge..........

Farris Sportsskyttere - kjempeklubb.

På grunn av jobbreise er eg for tida i Larvik. Eg har på førehand leita litt og funne ut at Farris Sportsskyttere held til her. Pardinien er demontert og med i ulike kofferter (og på meg) for tørrtrening, så det var jo berre å ta den med til Farrisgjengen.

Vel framme vart eg godt motteke, fekk komme inn utan problem (viste eige våpen- og klubbkort), og 5 min etter betalt ammo var eg klar på skytebana. Flott bane med 10 standplassar og svært hyggelege skyttarar. Flott å få utveksle erfaringar og prøve nye våpen. Litt rart å skyte med x-esse short, hoi kor den kastar seg i hendene :-)

Skytemessig gjekk det også svært bra. Til mi store undring gjekk eg denne gongen ned berre 2 klikk . Sist eg gjekk frå 12,5 til 25 meter måtte eg ned 10 klikk. Vel, vel. Fine samlingar, eit holdområde på 8-9 på rolege seriar, og faktisk stort sett haldområdet på 7-8 på 10 sek serie. ( Om ein ser vekk frå ein roteserie det heile 2 skot gjekk i det kvite - den tel ikkje).

Før eg visste ordet av det var 3 timar vekk.

Større tempo --> større holdområde som flyttar seg.

Ny trening på bana igår. Fekk litt tid å trene på tempo. Frå sida til canadashooting fekk eg lasta ned ein MP3 som gjev ein peikepinn på rytmen ein må ha på 10 sek serie. Når eg lyttar på denne og tørrtrener er det klart at eg må jobbe med løft. Her har ein ikkje tid til å kaste vekk løft langt over skiva, rett på holdområdet fort er løysinga. Ellers er det vanskeleg å unngå avtrekksfeil når det går fort ....

Eg skulle gjerne hatt ei god løysing på korleis ein kan tørrtrene på tempo heime. Ein kan jo ta fem liksomavtrekk etter kvarandre, men truleg trekker eg av for kraftig og får då for stor rørsle når eg slepper ut att finger til neste avtrekk. Er det nokon som har ein god løysing på dette ?

LItt trening på rolege skot igår, og holdområdet var greit. Nytta CCI istaden for Eley, ingen funksjonsklikk, men måtte justere opp siktet eit klikk. Ser ellers at eg har vore litt sløv med haldøvingar siste veka--- skjerpings.

Det går framover.....bare ikkje fort

Eg fekk tid til å skyte litt igår. Som ein ser av vedlagt bilete så er holdområdet med roleg skyting framleis bra. Det ser ut som tørrtrening er nyttig.

Utfordringa no er å få til det same når eg skal skyte 10 sek serie.  Med ein gong eg prøver å skyte litt fort , så vert holdområdet større, samt eg dreg skota ut til venstre.

Det skal ha litt å seie kva grep ein har, men eg trur at eg må legge om treninga litt.

Så, då er det berre å finstudere litt på korleis trene mest effektivt . KJem attende til det seinare.

Eg fekk også prøve Morini av ein kamerat. Etter nokre skot låg den godt i handa mi, den og. Litt ulik skjeftevinkel, men eg kunne nok venne meg til den og. På samlingane såg eg at Pardinien min også passa godt til min kamerat i nabobåsen.

Konklusjonen er vel at vi langt på veg må jobbe med oss sjølv, desse våpena er vel såpass bra at vi ikkje kan skulde på dei om noko går gale.