Back to basics.

Det har vore lite skriving i det siste, men årsaken er enkel. Det er lite å skrive om.

Etter den katastrofale konkurransen, har eg arbeidd med årsaken. Den "langvarige og djuptgåande" analysa har påpeika eit par enkle ting. Balansen må verte betre, så no trener eg balanse. Avtrekket er for dårleg, så her trener eg avtrekk.

Kontakten med kornet har vorte dårlegare, så no skyt eg mykje mot blank bakgrunn for å betre kontakt , fokus og avtrekk.

Det gjev sakte resultat, men eg må vel berre sjå i augene at pistolskyting krev trening.

Den må vere fokusert, målretta og planlagd. Så det held eg på med no. Sakte kryp flugene nærare midten.

Legg ved treningsskiva frå siste trening. Her er 18 skot, etter at eg har skote 30 skot i kulefanger. Ein viss framgang er det jo på trening.

Som ein fyrstereisgutt.

Igår var det tid for konkurranse att. For fyrste gong på 1 år skulle eg konkurrere i standardpistol. Eg hadde ikkje sett håpet høgt, men vona å kome over i B-klassa att.  Hausten har vore prega av ustrukturert trening, lite fysisk trening og knapt eit avtrekk heime. (Her kjem orsakingane på rad og rekke). Problemet var likevel i hovudsak manglande konkurransetrening.

Puls var venta, men at den skulle lage så mykje trøbbel var eg ikkje klar over. Eg fekk ikkje kontroll på balansen, eg fekk ikkje roa nervene, grepet var ikkje teke og festa der eg skulle med rett kraft, og styrken og uthald var for låg. Fokus var truleg ein stad mellom korn og skive, og i alle fall ikkje på avtrekk der det burde. Takk og lov for skytebriller som tvinga fokuset nærare kornet enn  blinken.

Dei rolege seriane der eg burde hente poeng vart slik halgeskyting, med tanke på spreiing. 2o og 10 sek var på same måten, betre samlingar, men dei flytta seg litt som seg hør og bør rundt på blinken.
Dei fleste seriane var over 40, men knapt over. Sluttresultat ? 500, altså i snitt 0,5 poeng for dårleg på kvart skot.

Så var det noko positivt? Vel tross alt skaut eg 500, og på ein dag utan god form, i ein periode med dårleg trening, skaut eg faktisk 500. Så noko må vel stemme, det må vere noko som stemmer med grunntrening og teori. Og for ein gamal hund som ikkje skal kunne lære nye triks, så har altså nokon triks komme seg på plass. I tillegg fekk eg litt blod på tann for tida framover, og rikeleg med innsikt i kva eg bør og må trene på.

Eg vil også skryte litt til Ørsta/Volda for den flotte bana. Sidan vi no framover kan skyte korrespondanse, så åpnar det for fleire konkurransar framover.

A slow mind works.....well, slowly.

Eg har dessverre ikkje fått trene mykje den siste tida, korkje heime eller organisert. Sånn er no livet. Konsekvensen er platåfase, og faktisk at eg ser at det går litt attende.

Det er freistande å gje litt opp, men ein får heller tenke smart (til forskjell frå å tenke dumt ???). Eg prøvde ein Gopro på trening, ca 45 grader på meg sjølv, og oppdaga då at balansen min var dårleg. Så når eg har moglegheit, så trener eg balanse. I heimetrening ser eg at fotstilling er nøye, og faktisk er det best om eg tåar ørlite innover. Vidare er eg svært medviten på at tyngdepunkt ligg midt mellom beina , men omlag rett bak tåballar. Kne skal ikkje låsast, og det må jobbast kontinuerleg for at balanse er korrekt. Desse få punkta, som eg kjenner frå tidlegare, men som krev kontinuerleg fokus, har gjeve relativt raskt resultat.

Så, kvifor slowly ??

Vel, for ei tid tilbake meinte eg å forstå korleis ein kan flytte kornet til høgre/venstre ved å endre masse til/frå styreflata nede på skjeftet. Alt godt forklart av Petter Brattli.

Ein russer har tidlegare forklart at ein heller bør klemme godt med veslefinger, og mindre med ring- og langfinger. Dette er jo litt motsett frå tidlegare lærdom, der ein skal ta vekta /klemme mest ved langfinger.
Det verkar jo mest logisk å klemme med veslefinger, då denne ser ut til å klemme styreflata mest i kontakt handa. Då vil jo pistolen ligge mest stabilt. Ellers har eg ein vag tanke om at det truleg er best å ha minst mogleg belastning på fingrane som ligg nærast peikefinger, dette for å la denne jobbe mest mogleg uavhengig.
Så, det er jo sikkert noko som dei fleste har forstått, men altså ikkje eg. Slow mind works,  well , slowly.

Dobbel skivebom.......argh !!!!

Dette året har det vorte lite konkurranseskyting av ulike årsaker. Eg har klart å halde klasse B i luft og standard, men ikkje konkurrert i VM-fin eller hurtig-fin. Denne helga skulle eg delta i hurtig-fin og luft på Vestnes, og neste helg ein standard i Ålesund. Så har eg fått litt fleire konkurransar. Så viser det seg at konkurransen i Ålesund er avlyst, og når eg no er kommen til Vestnes, så er konkurransen flyttta til neste helg. Irriterande at eg ikkje har sjekka opp, men det hjelp ikkje å vere frustrert. Det vert vel ikkje fleire konkurransar for det. Så , då får eg vel vente til neste år for neste konkurransen.

Heilt bomtur var det no ikkje, eg har fylt opp med ammo i .22 og 9 mm.

Skal eg vere heilt ærleg så er det vel greit. Eg har trena mykje på hurtig, men enno har eg ikkje lært . Det har vore lite trening med tid, dvs ladetid, 7 sek klar og reell skytetid. Utan dette får ein ikkje puls. Eg får nytte tida framover betre på faktisk konkurransetrening.

Treninga ellers går strålande mop grunntrening. Skal skrive litt meir om det seinare, samt om ein annan form for skivebom eg har byrja med......

Do. Or do not. There is no try (sitat Yoda).

Framgangen held fram. Eg las ein serie artiklar for nokre år tilbake der ein sterkt vektla repetisjon. Men dei gjorde meg litt meir medviten på kvifor ein skal repetere. For kvar gong ein les, eller lærer noko, så gjer ein det med aukande kunnskap. Ein vil då for kvar gong absorbere meir kunnskap, og få større innsikt enn då ein tidlegare las same tekst. Det kan tenkast at ein kjem til eit punkt der ein er utlært, men for meg vil ei slik haldning vere arrogant.

Kvifor skriv eg noko som er så sjølvsagt ? Det kan vere at det også finnast andre som er såpass trege som meg, og som kan dra nytte av litt meir opplysning. Men tanke var eigentleg eit bakteppe for kva som hender når eg no driv tørrklikktrening.

Tidlegare var det mot ei skive, og med eit vagt fokus på at siktebilete skulle vere perfekt og iro ved avtrekk.

Korleis gjer eg det no ?

Vel først er eg meir medviten på korleis eg tek grepet. Eg legg merke til flata for rekylopptak, svullen og korleis kontakten mot styreflata påverkar korleis kornet ligg i skuret. Fingeren på avtrekker. Kor hardt trykker midt på finger nr 3-5 ? Er fingertuppar frie ? Er tommel fri ?
Spenning i leggar, lår, hofte samt rygg og mage. Lite løft av hæl og senking for å få rett spenning.
Løft med kun rotasjon i skulder med medvite forhold til pusten. Stemmer posisjon (ved skive) ?

På veg inn i avtrekker trekk ein inn Yoda si befaling. Do. Or do not. There is no try. Altså om alt stemmer, start avtrekk med fast handledd og gjennomfør. Ikkje forsøk, gjer, eller avbryt.

Etter avtrekk, etterhald og avslutt med innpust.

Alt dette går føre seg i eit stort, men ellers tomt hovud. Det er faktisk såpass mykje at eg godt kan nytte 30 min på tørravtrekk utan at det vert kjedeleg eller tregt.

Rådet om tørravtrekk heime har alle høyrt, og det er klart det kan vere kjedeleg, men om ein nyttar filosofien til Harald Stenvaag går det greit. "Alle avtrekk kan gjere deg til ein betre skyttar, eller ikkje. Du bestemmer."

Sakte framgang.

Eg har skrive ein og anna innlegg siste tida om teori bak skying med pistol. Eg prøvar å verte noko meir strukturert, og kjem kan hende med ein betre oversikt etterkvart. Prøver å legge det ut som ei fil som eg kan oppdatere etterkvart som den vert betre. Førebels er eg på ca 7 sider (men med figurar :-))

På treningsfronten går det stadig framover. Eg har adoptert ei litt fastare ramme generelt, dvs litt fastare grep på pistol, auka muskeltonus, og fokus meir på avtrekk. Avtrekket er framleis ikkje bra nok, men det kjem seg. Ein og annan slenger ser eg enno, men eg skyt med mykje større sjølvtillit tross mindre trening. Samlingan er generelt mykje betre. Eg trener for det meste 20 sek serier, men nyttar og SCATT og eg likar det eg ser.

Så, eg vil tilrå at dei som har tid les heftet til Bratli samt dei to artiklane eg har likna til og gjer seg nokre val. For dei som ikkje gidd dette, så får ein vente på den spennande oversikten eg sjølv kjem til å legge ut :-)

Posisjon - kvar skal nasa peike ?

Ifølge Anatoliy (A )(pr 2003 ) er rådande tanke at det viktigast er indre stabilitet, og at ein kan finne stabilitet i nærast alle posisjonar (ein tenker her på Moritz Minder si spesielle stilling der pistolen låg nærast sidelengs). Ein ser også skyttarar som har byrja karriera med sida mot skive, og ila karriere har skifta til å sjå rett mot skiva. Dette understreker at stilling /posisjon er og vil vere individuell.

Det viktige er at ein skyttar finner sin posisjon som gjev optimal muskulær tonus (spenning). Det vil IKKJE seie stillinga med minst energi, men det som gjev maksimal stabilitet. For dei fleste krev dette at ein spenner seg ein del. Eit råd er at ein for å få maks stabilitet i anklar, kne og hofter løfter seg ørlite på tå når ein løfter pistolen, og så senker seg ned utan å bøye seg bakover. Her er det best om føtter er parallelle.

Ein har tidlegare lært at skytestilling må vere fysisk og mentalt energieffektivt. Dei fleste finn ein avslappa stilling i balanse, men ein får visse skot som ikkje går der dei skal. Anatoliy (A) peikar på at ein bør ha ei noko styrka og bestemt stilling, og at denne vil hindre streifskota som ein får i den avslappa stillinga. Det vert påpeika at sjølv om råda er å vere avslappa, så er ikkje stillinga til mange av dei beste skyttarane den mest avslappa ein kan sjå.

I boka «Olympic Pistol Shooting» (OPC) (ISBN 3-9809746-2-8 ) går dei noko lengre og forklarar kva kompromiss ein må gjere. Ein har i utgangspunktet 2 ytterpunkt.

Den beste stillinga for hovud, nakke og auger mop blodforsyning mm er stå med kropp rett mot skiva. Som ein ser av figuren vil ein måtte flytte handa litt inn framfor kroppen. Den raude pila skal illustrere krafta som rekylen danner. Ein ser at denne gjer at handledd, skulder og kropp får ein vridning som ein må kompensere og rette opp att før ein kan ta neste skot. Stillinga er altså grei til enkle skot med god tid. Mangel på kroppsmasse rett bak rekylen gjer imidlertid at ein må spenne kroppen desto meir får fange opp denne i raske skot. Ein får heller ikkje så mykje gratis i løftet. Petter Bratli forklarer dette godt når han viser til at brystmuskelen i den skytande handa er pressa saman, og ryggmusklar er strekt slik at skytehanda nærast vil dra seg utover. Ein kan truleg kompensere på eit skot, men i ein serie vil kroppen dra skota uover mot høgre.

Den andre stillinga etter OPC er reint sidevegs. Her vil vridning i hovud og nakke gjere at blodforsyning, musklar og nerver ikkje har det bra. Brystmusklar vil tendere til å dra handa inn mot midten i serier, og bakre skuldermusklar vil truleg skubbe litt samme veg. Fordelen med denne stillinga er at all kroppsmasse er rett bak pistolen. Rekylen går rett gjennom handledd, arm og gjennom skulder inn i kroppen. Rekylopptaket er dermed mykje rolegare. Om ein klarer å kompensere for ulempene , kan ein altså skyte fort og kontrollert med godt rekylopptak.

Mi eiga tolking av dette er at utgangspunktet på 45 grader på siktelinja er greit. Så får ein prøve seg fram gradvis. Eg trur at trening og medvite spenning som er tilpassa (ifølge A) gjer at ein kan velje gå meir mot dei ytterpunkta ein føler passar best.Spenninga gjer at ein kan overkomme og motverke nokon av kompromissa ein må gjere , i alle høve i ei viss grad. Ved fysisk trening, styrke og tøying vil ein truleg også kunne gjere noko med fysiske forutsetningane kroppen din har. Det var grunnteorien bak dette så langt eg har misforstått den. Fleire misforståingar følger.....

Litt grunnteori eller noko sånt

Pistolskyting er fasinerande, svært lett og kjempevanskeleg. Det er lagt opp slik at det er umogleg å utføre det slik at alle faktorar vert teke omsyn til på ein optimal måte. Ein må heile tida gjere kompromiss, og kva ein vektlegg mest for å få best resultat er svært individuelt. Du vil dermed aldri verte heilt utlært, og alltid finne vegar å verte betre.

Grunnprinsippet er enkelt. Skyttaren skal vere eit stabilt stativ for pistolen, og trekke av medan våpen er retta mot senter av blinken. Dette skal ein gjere innanfor visse tidsrammer og på visse måtar.

Bakgrunnen for mykje av det eg skriv er fritt kokt saman av ulike tekstar og bøker som Pistolskyting Petter Brattli, Olympic pistol skyting, nettfora mm. Det kan godt vere at eg ikkje har forstått alt, men det er jo flott om nokon får større forståing ved å lese dette. Send meg gjerne tilbakemelding i så tilfelle, så eg kan verte betre.

Det kan vere at eg er litt treig, men mykje lesing, diskusjon og prøving i mangel av ein god trener gjer at det er vanskeleg å utvikle seg på ein sikker måte. Dette med bakteppe av at alle valg vi gjer i skyting krev kompromiss. Korleis skal eg eg så kunne vite at vala er meir eller mindre rette ? Kor lenge skal eg vente på resultatet ? Kva er resultatet eg ventar på ? Kan eg vere viss på at eventuelle endringar skuldast det eg har gjort medvite eller er det noko anna som har rota seg inn ?

For dei som orkar må eg dessverre skrive litt om bakgrunnen for kvifor eg føler eg har oppnådd eit høgare kunnskapsnivå. Det grunngjev mykje av endringane den siste tida. For om lag 1 år sidan tok eg til å trene med ein SCATT simulator. I byrjinga var dette berre noko som var svært kjekt å sjå på, «live» skyting heime med fine strekar. Som den treigingen eg er, tok det meg nesten eit år å forstå kva denne eigentleg kunne gjere. Den gjev mykje data , og det er lett å gå seg vill. Førebels er det 2 sett med data som eg synest eg har svært stor nytte av.

Det eine er length of trace, eller lengde på sporet som sensoren registrerer ei definert tid før skotet. Er ein svært uroleg og virrar over heile blinken, så vil denne naturleg nok vere lang. Den gjev altså ei tilbakemelding på kor uroleg ein er. Det er her ein får ein slags fasit på kor stabil ein er før ein trekk av, det er her styrke, uthald mm viser seg. Ein god og stabil skyttar som har gjort det fysiske grunnarbeidet bra, vil naturleg nok ha mykje kortare lengde. Det gjev eit mål på det som på engelsk gjerne vert kalla arc of movement (AM), altså kor mykje ein virrar.

Det andre, og for min del mykje viktigare, datasettet, er absolutt avstand frå senter teikna mot tid. Sensoren viser til ei kvar tid kvar våpenet peikar på blinken, og viser dette som avstand frå sentrum av blinken. Når skotet går, vert det registrert, og så byrjer analysearbeidet. Anatoliy Piddubnyy skriv dette godt i artikkelen http://www.pilkguns.com/anatoli2.shtml.

Poenget med denne grafen ein då får opp, er at ein hjå svært mange skyttarar, inklusiv meg sjølv, ser at ein held våpenet relativt stabilt fram til rett før avtrekket. Det fortel oss at AM eller virring om du vil er relativt liten, og vi har eit godt haldområdet. Om skota hadde gått i dette området, så ville vi alle skote i klasse A eller B. Men det gjer vi ikkje, kvifor det ? Vi ser jo på kornet, trekker av umedvite og likevel så går ikkje alle skot i sentrum.

Om lag 0,3 sek eller så før skotet hender det noko hjå mange av oss. Brått aukar AM og virringa, og når skotet kjem så fell det som ellers tilfeldig i haldområdet, men no har haldområdet vorte så mykje større, kvifor det ? Kva hender rett før avtrekket, og kvifor går så haldområdet ut i det kvite ?

Anatoliy P meiner vi må tenke annleis, trene annleis enn det som er opplese og vedteke.

Fast grep, litt auka spenning i kropp - ny 50 serie !!!!

Prøvde idag skyting med handleddstøtte. Bilete er IKKJE frå dette. Faktisk stemte det som mange meiner, ein skyt ikkje betre med støtte då ein gjer dei største feil i avtrekket. Så med støtte gjekk det ikkje spesielt bra.

Etter nokre serier på 20 sek , ville eg prøve nokre serier med press. Dette er første 5 skot som eg meiner er ein 50 serie. Dei neste 5 skot var 48. Dette lovar bra.

Eg prøver no å følge råda frå artiklane som eg skildra. For dei som ikkje har lese enno, så tilrår eg spesielt artikkel nr 2. Alt i nr 1 står i nr 2. Den er litt tung, men vel verdt å lese. Eg skal prøve å omsetje den , i alle høve dei viktigaste delane etterkvart.

It is all in the wrist ?

Eg vil rå dei som ynskjer å verte gode i pistolskting til å lese følgande artiklar:

http://www.pilkguns.com/anatoli.shtml
http://www.pilkguns.com/anatoli2.shtml

For lang tid tilbake la eg ein link til ein tråd på targettalk som omhandla akkurat dette. Det kan sjå ut som om meir fokus på handledd og avtrekk er vegen å gå framfor alt fokus på korn. Dvs fokus skal vere på kornet, men truleg skal tanken og automatikken vere meir stilt inn på avtrekk og førebuingane på skotet ?

Eg påstår  å ha nokon fasit, men dette har gjeve svært gode resultat for skytinga mi den siste tida.

Eg dristar meg til å legge ut bilete frå SCATT



dette er saksa frå følgande side :

http://www.scatt.com/articles/19/coordination_analysis+/

Les og tenk litt. Gje meg gjerne tilbakemelding

Trening, trening og atter trening.

Som eg tidlegare har skrive, vert det truleg ingen NM på meg i år. Luft NM kom og gjekk utan meg på pallen (her er vi alle sikre på at eg ikkje hadde vore på pallen om eg hadde delteke ). NM bane vert nok også utan meg, så det vil nok bli lett for dei andre, ja. I tillegg ser det ut som om det vert få konkurransar på meg fram til oktober. For ein del disiplinar vil eg nok falle ned i klasse D grunna manglande konkurransar.

Med, eg får sjå på dette som ein gylden moglegeit for å perfeksjonere skytinga, og her er heldigvis mykje å jobbe med, både skyteteknisk, fysisk og mentalt.

Nye briller har gjeve eit bra løft, og fokus på kornet kjem seg stadig. Det er vanskeleg å seie sikkert, men eg klarer no kan hende full konsentrasjon på rundt 50 % av skota, og det aukar stadig. Bra fokus på korn gjer at eg ser at eigenskapar som balanse også må jobbast med. Styrke kjem seg og, men her har eg enno mykje att før eg er stabil nok. Uthaldstreninga kjem seg gradvis, men også her må skruen skruast til enno litt.

Eg har fleire gongar tidlegare skrive om kor mykje eg har å hente på det mentale. Truleg har eg komme meg ein del, men eg framleis så mykje att på grunnteknikken, at det mentale får ligge inntil vidare. Dvs , der eg kan , trenar eg sjølvsagt dette og, men fokus ligg framleis på det grunnleggande.

Nytt syn på blinken..

Eg har over lang tid lagt merke til at det vert vanskelegare å halde fokus på kornet etterkvart som ei skyteøkt eller ein konkurranse skrid fram. Mistanke til dårleg konsentrasjon , og ei eiga evne til å søke opp skiva for å sjå kvar skotet gjekk har vore hovudmistenkt. Synet er normalt bra, både til avstand , lesing /data mm utan at eg treng briller. Eg har frå tidlegare nokre briller som eg skal kunne bruke til dagleg, utan at eg føler stor nytte av desse. Eg er lett langsynt, og kan derfor kompensere bra i det daglege.

Igår skaffa eg meg lesebriller i 1,5 og 2.0 frå Nille (for å teste). 2 var for sterkt, men 1,5 var ei ny verd. No er det litt kort tid å uttale seg etter ei skyteøkt, men det var utan tvil mykje lettare å halde fokus på skiva utover økta. Truleg må eg nytte musklane i augene intenst når eg skyt, og dette gjer at dei vert fortare slitne, derfor behovet for briller. Vert spennande å sjå framover.

6-10 april var eg ein tur til Tromsø. Til skilnad frå tidlegare vare det kun luftpistol som var i bagasjen. Eg vitja Tromsø pistolklubb og fekk omvisning i eit flott anlegg. 5 skivetrekk for luft og 5 elektroniske skiver for krutt. Eg fekk ein lang og god luftrening, og bekrefta at eg ikkje er så aller verst, men ikkje så aller best heller ......

Meir struktur på trening er bra.

Sjølv om aktiviteten på bloggen har vore dårleg over noko tid, så vil ikkje det seie at eg ikkje trenar. Langt derifrå. Dei siste månadane har eg vore langt meir strukturert enn tidlegare, men det er framleis langt att til eg er der eg vil vere. Dessverre ser det ut som både NM luft og NM bane utgår i år, men eg får komme attende sterkare seinare.

Kva har så hendt i det siste. Eg har skaffa meg Petter Brattli si bok og boka Pistol Shooting - The Olympic Diciplines. Dei er begge lese ein gong, og eg tek snart til på ein meir grundig gjennomgang.

Desse utfyller kvarandre bra, og for oss som er utan trenar gjev det eit mykje betre teoretisk bakteppe som vi kan nytte i treninga. Vi kjenner oss betre rusta teoretisk, men ser klart kor mykje vi manglar ein trenar til dagen. No må eg starte på ny att, dvs ikkje heilt. Det vi har av kunnskap har vorte meir systematisert og fokus på einskilddelane i skytinga er meir funderte og vala ein gjer har vorte meir medvitne. Eg trur nok at dei neste månadane må nyttast til ein meir fokusert gjennomgang av bøkene slik at teorien synk klarare inn.

På same tid er treningsregimet mitt endra ein del. Eg trener fysisk x2-3 pr veke (forutan dei siste vekene med ein kjedeleg ryggsmell), men fokus på intervall, styrke og uthald i skulder, alboge og handledd, samt rygg og mage. Skyteteknisk jobbar eg meir fokusert x2-3 pr veke med avtrekk, fokus på kor og i det heile gjere det samme gong etter gong. Petter si bok var svært bra på mange element, og Steenvåg sit råd frå tidlegare vert klarare og klarare : kvar skot kan gjere det betre,  eller i verste fall dårlegare. Ein må derfor utføre kvart skot slik at det bidreg til vegen framover.

Grunnlaget eg har å bygge på er betre enn frå start, men eg reknar med at treningsarbeidet vert meir fokusert og endra smått om senn etterkvart. Det er merkeleg kor vanskeleg det er å halde fokus på kornet og ha eit reint avtrekk rett bakover.......

Ny pers standard 529.

Igår var det stemne på Vestnes og eg gjennomførte standard og luft med resultat 529 og 535. Det første var eg forsåvidt nøgd med, ny pers er ikkje å kimse av, men som ellers var det nok å ta av mop vegen framover.

Luft var forsåvidt greit, men eg vart nok hemma av manglande styrke. Eg har  trena lite fysisk aktivitet dei siste par månadane, og det var tydeleg at her er potensiale. Det var ei grei gjennomkøyring.

Kort blogg idag, etter for lang tid, men det hender mykje for tida mop trening , framgang og teknikk. Vil komme attende sterkare.

Hovud - skulder -handledd - trykk, handledd, trykk ....(fritt omskrive)

Eg har ikkje vore aktiv siste tida på bloggen, men eg har lese og tenkt ein del. Eg jobbar framleis om lag på same måte som tidlegare på trening, men det har vorte litt mindre tid enn ønska. Løysinga må vere å trene fullt motivert, konsentrert og med klart mål og meining.

Eg har lese litt på følgande  :
http://www.pilkguns.com/anatoli.shtml

Eg har vidare studert ein del på ISSF sine youtubesider : http://www.youtube.com/user/issfchannel og sett på video av 50 m , 25 og 10 m pistol.

Kva har eg så lært ? Vel, fokus går meir og meir vekk frå kornet og siktebilete som aktivt punkt, og meir over på aktivt fokus på avtrekket. Tross mindre tid nytta , så vert resultata mykje betre enn på lenge. Det kan jo vere at eg er meir fokusert, men likevel trur eg fokusendringa er nyttig.

Kva som med hovud og skulder ?

På videoane har eg lagt merke korleis løftet vert utført. Ein del vel å ha eit rotasjonspunkt som nærast ligg i hofta som er skote fram. Dette medfører at hovud må gå bakover og mage og rygg må jobbe dyanamisk og ikkje statisk. I tillegg til å kontrollere rotasjon av skulder så må ein ha dynamisk kontroll på rygg og mage når ein skal stoppe. Ein ser det klart på hovudet, om det flyttar seg bak eller ikkje.
Dei som ikkje roterer i hofta, men som vel å ta ein såkalla powerstance, tek ut det meste av rotasjonen i skulderleddet. Hovudet er i ro det meste av tida. På raske serier, dvs duell og siluett , så nyttar dei fleste kun rotasjon i skulder. På rolege disipliner ser ein større mengder rotasjon i hofta på fleire.

Observasjonen gjev ikkje noko meir sikkert, dvs det er ikkje slik at dei som har eine typen alltid vinn over dei som vel den andre typen rotasjon. Kva så ????

Vel, eg har relativt lite oppmerksomheitsspenn. Eg har begrensa evne til å lære motorikk (er langt over gullalder for det) så eg må gjere det eg kan for å minimere variasjon. Når eg nyttar powerstance og tek ut all rotasjon i skulder, så er det mindre variablar. Vel eg større hofterotasjon, så får eg meir å kontrollere. I utgangpunktet skal jo kroppen ordne alt dette sjølv, men eg trur førebels at eg også her får vere medviten kva eg gjer.

Så fokus er altså for tida korrekt avtrekk, korrekt handledd og fokus på stilling. Så får vi sjå korleis dette vert.

Trondheim pistolklubb - kjekt at dei ville treffe meg :-)

Denne veka har eg vore på jobbkurs i Trondheim. Eg har dessverre ikkje kunne trene heime, men som vanleg var SP og LP med på turen. Måndag vart det bomtur, då eg trudde eg skulle få trene på luftbana. Dessverre var det ingen som møtte opp, eller så var eg på feil stad.

Tysdag vart eg møtte av Per Marum på Buran. Korrekt nok vart våpenkort sjekka saman med identitet, noko som verka betryggande. Eg trur vi skal innføre dette også hjå oss.

Så var det laus på duelltrening på elektroniske skiver. Ein skulle trene på etterhald ifølge opplegget dei hadde. Eg oppdaga då at dei fleste  (og eg sjekka med issf channel) vel å løfte rett før klar og så senke i dei første 7 sek. Dette må prøvast framover. I tillegg valde eg å stå litt smalare med beina enn vanleg. Dette gav mindre smerter i hø hæl som ofte lir litt under lange økter. Balansen verka ikkje å verte forstyrra.

Eg fekk svært gode resultat undervegs. På duell og raske serier var det lite tid til å tenke på trykk, her er det tydelegvis nok å fokusere på korn. Avtrekket kjem her av seg sjølv meir eller mindre. På rolege serier må eg nok enno fokusere på trykk, så eg trur eg skal halde fram på samme måte som tidlegare her.

Første dagen skaut vi ein serie på 60 skot i standardprogram, der ein skulle skyte 10 sek på alle seriene. Resultatet vart 515 totalt, det er ikkje verst med tanke på at alt gjekk fort :-)

Onsdag var deg også trening på samme måte. Her var det først presstrening, og av 40 skot var det kun 3 som ikkje var 9 eller 10. Faktisk var vel om lag 2/3 av desse skota 10, og dette må ein seie seg nøgd med førebels :-)

Det var nok ei god hjelp at klubben har ei god bane med god belysning over standplass slik at det er lett å fange opp kornet med ein gong våpenet kjem opp.

I tillegg har eg skaffa nokre skot med TopShot ammo. Denne er rimeleg og fungerer svært bra utan matefeil og utan for mykje skit i våpenet. Kan hende eg skal prøve denne ei stund.

Summen : fokus på korn, fokus på trykk , litt kortare beinavstand og lys på standplass. Oppmodar alle med våpen å ta kontakt med TPK for ein hyggeleg prat og fellestrening, men ta kontakt med dei på førehand pr mail.

2 ting på ein gong - kan såkalla menn klare det ??

Treningsprogrammet for hausten synte seg å vere for håpefullt. Det har dessverre vorte lite fysisk trening. Svært lange arbeidsdagar har stoppa dette.

Eg har likevel jobba svært planmessig på trening. Eg skyt press kvar 2 gong, og duell/hurtig kvar 2 gong. Det ser ut til å gje resultat, for samlingane vert betre. Eg ser også at fokus må vere meir og meir på avtrekk. Når fokus primært er på avtrekk oppnår eg gode resultat, betre enn når det er heilt umedvite. Scatt legg vel også opp til dette.

Treningane har vore svært gjevande, og det er jo kjekt å skyte når flugene vert færre. Igår, td, vart det først duell, så hurtig, og når eg gjekk fram var det ikkje mange 8 på 100 skot. Etter dette koseskyting med cz etter at ein hyggeleg kar troppa opp med 200 ferskladde 9 mm. Her var samlinga om lag i 7 i presskiva. Kvelden vart avslutta med LP10  med gode resultat. Det er kjekt å skyte.

Lenge sidan sist.

Eg har skifta jobb for ein periode, og dette har teke mykje av tida mi. Dessverre har eg nedprioritert bloggen. Eg har som skildra tidlegare lagt om treninga,, og prøver å bruke det eg har av tid på fysisk trening. Eit stort forfall skal justerast.

Skytinga går rimeleg greit, har hatt opptil fleire serier med 50 p på trening. Eg får ikkje trent så mykje med Scatt eller tørravtrekk som eg vil, men får skote kvar veke. Ei veke er det press og ei veke duell og hurtig. Alt på tid og framgangen kjem sakte.Det vert meir og meir klart at Scatt - gutta har rett, ein må ha fokus på avtrekk. For min del vert resultatet mykje betre då.

Det er noko som ikkje heilt stemmer på grepet på SP, då eg føler pistolen hoppar litt for mykje i hurtigserier. Kan hende eg har vorte så god at eg først no legg merke til det :-)

Siste dag NM. Opptur ny pers i VM-fin 549

Etter gårsdagens lærepenge var det attende på ny frisk. Eg stilte idag med mi faste rosa piquetskjorte i håp om at det spelte inn.Det er framleis ingen som mobbar væpna mann i rosa skjorte :-)

Litt meir analyse av gårsdagens katastrofe fekk fram at problemet delvis låg i lite fokus på korn, men mest på uryddige avtrekk. Idag var dette betre på plass. Eg jobba hardt med å fokusere på korn og hugse tryyyyyykk. Store delar av dagen fungerte dette bra. Nokre glipp undervegs, og ein godtkjend funk.feil i 3 serie duell forstyrra litt. Likevel enda eg på 549, ny pers med 9 poeng.Totalt 28 plass er absolutt godkjent.

Så , vegen framover :
- trene duell  og hurtig på tid på trening.
- pusteteknikk på duell må inn.
- trene press og 10 sek serie på tid med førebuing.
- meir fokus på mental trening, og avslapping. Jobbe med mentale delar.
- fysisk : uthald og styrke må på plass.

Meir detaljert plan får komme seinare.

NM Løvenskioldbanen. 2/3 ferdig. OPPTUR og nedtur.

Eg vil gje stor skryt til dei som har teke på seg å arrangere NM i år, flott arrangement. Eg trur ikkje nokon vert vonbråtne når eg trekk fram Lars Kanedal og Siri Vaggen Olsen som primus motor. Vi får håpe at dei ikkje går heilt lei og vert utbrende. Kjempejobb.

Så over til noko mindre viktig - skyting mi.

Igår var det hurtig fin. Eg ser på eigen hall of shame at eg ikkje har konkurrert i dette på mange månadar (9?) så forventninga var ikkje så stor. No skal det seiast at det meste av treninga siste tida har vore raske serier på press og duellskive med forsåvidt greit resultat. Eg oppdaga tidleg at 10 sek seriene gjekk greit og jamnt var eg ferdig på under 8 sek, så eg kunne slappe av på både 10 og 8 sek serier. På 6 sek var det litt meir roting, men faktisk greit nok. Konsentrasjonen slapp litt undervegs, så eg trur at totalt 3 serier var under pari. Resultatet enda på 546 p , 23 p opp på pers. Total nr 39. Ikkje dårleg, må seie meg nøgd med det.

Idag var det standard. Gode førebuingar, var ikkje sosial , god oppvarming, men når sant skal seiast var eg likevel ikkje mentalt med. Førebuingstida vart nytta godt, med puls og tremor. Prøveserien sat bra og eg var godt innskoten. Første serie enda på 41 p, med TO sju !!! Då gjekk lufta litt ut av meg. Tremor forsvann og eg samla meg. Dei neste seriane tom 20 sek gjekk bra. Då desse var ferdige hadde eg 364 , og potensialet for ein god omgang var definitivt der. SÅ skjedde det som vanlegvis skjer. Fokus gjekk frå korn og over på at eg kom til å skyte over 540, ønske om å havne oppe på lista. Første 10 sek gjekk som den måtte gå. Eg skaut faktisk ein 3 ######&&%¤%&&. Ein av dei neste serien gav 35 )(/)&//%/¤&%¤%¤&%¤. Kvar fokus var veit eg ikkje, mentalt var eg fråværande. Alt revna og totalt på dei siste 4 seriane kom eg så vidt over 150 p. Har ikkje skote så dårleg på 2 år. Lærdom - slutt å tenke. Fokus på korn. Passande at eg fekk denne lærdomen i fleisen idag. Så, om ikkje anna er motivasjon til å konkurrere på topp enno. Totalt enda eg på 520 p. Så tross total svikt på slutten var eg nesten på pers. Det seier litt om potensialet når eg skyt på mitt beste. Grr

Imorgon er det VM-fin. Går til dette med blanda kjensler, men får gjennomføre. Ta det som trening og erfaring før eg dreg heim og tenker på hausttrening. Her vert det samling på bånn.